15 قاعدة ذهبية في إسعافات الحروق الأولية:
- ١. مسببات الحروق كتيرة منها حرق باللهب أو السوائل الساخنة والمغلية أو المواد الكيميائية (حمضية أو قلوية )أو حرق بالكهرباء (تيار عالي أو منخفض).
- ٢.في حالة الحرق بالسوائل الساخنة أو المغلية أو حرق اللهب لازم تشيل كل مايلامس الجلد من ملابس وغيره لأنها مصدر مستمر لعملية الحرق .
- ٣.لو كانت الملابس لزقت علي الجلد اللي اتصاب بالحرق وصعب إزالتها يفضل انها تتساب ويشيلها الدكتور بمعرفته .
- ٤. وضع المكان المصاب بالحرق تحت المياه الفاتره (وتحتها مليون خط) لمده متقلش عن ٢٠دقيقة …وممكن توصل لساعات طويلة في حاله الحرق بالمواد الكيميائية لأنها بتخفف حدتها علي الجلد والأنسجة .
- ٥.بلاش وضع تلج أو بيض أو ملح أو معجون أسنان أو دقيق علي المكان المصاب بالحرق ..لانها بتضر الجلد أكتر مابتنفع .
- ٦.أحد أهم وظائف الجلد هو المحافظة علي درجة حرارة الجسم في المعدل الطبيعي ..لكن في الإصابة بالحرق الجلد بيفقد الوظيفة دي وبالتالي بيفقد درجة حرارة الجسم بسرعة ( Hypothermia) بالذات لو مساحة الحرق كبيرة وده ممكن يؤدي للوفاة .
- ٧.في الحالة دي بنلف الشخص المصاب بالحرق بغطاء نضيف عشان نحافظ علي درجة حرارته ونطلع بيه جري علي المستشفي .
- ٨.الحالات المصابة بحروق أكتر من ١٠٪ من مساحة الجسم في الأطفال أو أكثر من ١٥٪ من مساحة الجسم في البالغين لازم يتم حجزهم في وحدة الحروق في المستشفي .
- ٩. كل شخص مصاب بالحروق تحت سن ٥سنوات أو أكتر من ٦٠سنه لازم يتحجز في وحدة الحروق في المستشفي .
- ١٠. لازم يتحجز كل حالة مصابة بالحروق في الوجه أو اليد أو القدم أو المناطق الحساسة أو الحرق الدائري.
- ١١.الحروق بالمواد الكيميائية (أخطرها القلوية) وحرق الكهرباء (بالاخص التيار العالي ) والاستنشاق اللهيبي ( بيتسبب في خلال ساعات التهاب عنيف في الحنجرة بيؤدي الي أختناق قاتل في خلال ٢٤ساعة). الحالات دي لازم تتحجز في المستشفي .
- ١٢.حالة مصابة بالحروق مع وجود أمراض مزمنة زي الضغط والسكر وغيرها لازم برده تتحجز في المستشفي .
- ١٣.مش كل الحروق علاجها ميبو وديرمازين واسبراي رش .
- ١٤.تحويل الشخص المصاب بالحروق لمستشفي فيها وحدة حروق مجهزة لاستقباله لمعرفة نسبة الحرق ودرجته وإذا كان من الحالات اللي لازم تتحجز أو تتابع غيارات في البيت .
- ١٥. التعامل مع الحروق بيتم فقط عن طريق جراح التجميل والحروق لان ده تخصصه (مع الاحترام لكل زمايلنا من التخصصات المختلفة)
#نهاد_دغيدي